مي الفيجه غير

مشاركة مها مقداد

فيجاااااا …….  فيجااااا…… بياع الفيجة عالبسطة

شعور الفرح لأهل الحي بقدوموا والأطفال عم تتراكض لعندو، عم يصفوا ورا بعضن. وأنا صغيرة كانو يقولوا انو اللي بيشرب من مية الفيجة بيطول عمرو وأنا كنت اضحك واستغرب، ماكنت بعرف شو هيا مية الفيجة. كنت اتخيلها انو شو بتفرق عن المي العادية انو ليش الناس بتفرح بهي المي انو ليش صوت بياع الفيجة غير كل الأصوات

بس وقت وعيت عالدنيا وزرت بيت فيو حنفية مية فيجة كنت مبسوطة كتير انو وأخيراً بدي اشرب فيجة اخيراً بدي اتعرف عمية الفيجة

لما فتحت الحنفية و نزلت المي  كانت بااردة وصاافية وكانت طعمتها كتير طيبة حسيت بوقتها انو عنجد طول عمري، حسيت انو هي مية الشام هي غير كل المي

بعدا عرفت انو المي بتقطع ما بتضل بالحنفية طول اليوم ولقيت الناس عم يعبوا قناني مي مشان بس تقطع يضلوا يشربوا فيجة. قديش الناس بتحب الفيجة وقديش الناس بدا يطول عمرا.قديشك عظيم يانبع الفيجة، سقيت كل أهل الشام

قديشك الك فضل يا ناظم باشا، أيام كانو بدهن ينقلوا الفيجة عالشام بقنوات محمود باشا عارض الفكرة وقال: مياه أنهار دمشق أخف من مية الفيجة

فناظم باشا جمع المجلس البلدي وقلن أثبتولي انو مياه الأنهار أخف من مية الفيجة. فجابو تنكتين وحدة مية فيجة و وحدة مية قنوات و وزنوا التنكتين فطلعت مية الفيجة أتقل. فقام ناظم باشا بعزل رئيس وأعضاء المجلس البلدي.وفتح قنوات الفيجة و وصلها عالشام. ناظم باشا كان بيعرف قيمتك يافيجة

ولما كبر عدد سكان الشام كتير وما عادت المي بتكفي خلال فترة الاحتلال الفرنسي  (من 1920 – 1946) ففكر بعض أهل الشام  بتشكيل لجنة لمي الفيجة بسنة 1922  ليجيبو كميات مي  اكتر من نبع الفيجة عالشام

هي قصتك يا فيجة حكيتها، ونحنا ناطرين على أمل يرجع نبعك يسقينا